Caso de estudo: a personalización dun proxecto empregando chapa de madeira
Como converter unha sede corporativa nun auténtico traxe á medida que represente a identidade do cliente? O arquitecto Antón Varela e MRM Arquitectos explícannos por que recorreron ao taboleiro chapado en madeira natural para La Conexión de Finsa
Estética, respecto do medio ambiente, prezo económico, técnica... Todas estas características combinadas converteron o taboleiro chapado en madeira natural nun elemento fundamental dentro do proxecto de La Conexión, a sede central das oficinas de Finsa.
MRM Arquitectos e Antón Varela querían facerlle un traxe á medida ao cliente, tanto no relativo ao futuro uso como aos materiais empregados. «Pedíronnos unir eses dous edificios separados para convertelos nun», explica Varela. Así nace La Conexión, que se vertebra en dous eixes fundamentais: a unión dos dous edificios das oficinas centrais a nivel funcional e outro eixe máis poético que une o monte do exterior co produto transformado na fábrica, situado ao outro lado.
A sede central da multinacional da madeira tiña que mostrar os seus coñecementos con ese produto ao que lle dedicou toda unha vida. En palabras de Mamen Escorihuela, de MRM Arquitectos, tratábase de «reducir os materiais, a estrutura e o espazo á súa esencia primaria». Nese sentido, as fachadas teñen forma de panos vidrados, con carpintería oculta, e os materiais do edificio limítanse á madeira e ao vidro.
Caso de estudo do material: chapa de madeira
En La Conexión vemos diferentes usos da madeira: estrutural, mobiliario, revestimentos... A súa sinxeleza minimalista inspirou tamén a composición e a naturalidade dos acabados mediante o emprego dunha cantidade limitada de materiais. Entre os produtos Finsa aplicados centrámonos na chapa de madeira natural, que se atopa nos taboleiros MDF chapados en Knotty Pine.
Ademais da súa contribución estética, os taboleiros chapados con madeira natural teñen valor económico e ecolóxico porque aproveitan os recursos naturais mellor que a madeira maciza. En cuestións técnicas, están tratados e brindan unha capa de seguridade adicional contra os incendios polas súas propiedades ignífugas que a madeira maciza non ten.
Escolleuse esta chapa porque combina perfectamente coas vigas do teito, que están feitas de madeira laminada. Trátase de vigas de 22 metros de longo que se cadran de piar a piar e deixan a estrutura á vista. A cuadrícula posterior creouse con taboleiros chapados rañurados para mellorar a acústica aínda que tamén se recorreu a paredes opacas para dar continuidade.
Porén, as divisións fixéronse de vidro, que achega unha «falta de intimidade visual moi operativa: un pode estar nunha reunión e á vez decatarse de que chegou alguén a quen lle tiña que contar unha cousa... É moi dinámica; a praza honra o seu nome», indican desde MRM Arquitectos.
Caso de estudo do concepto: a personalización
«O cliente pediunos que o edificio eliminase as barreiras arquitectónicas existentes (dúas estruturas incomunicadas), que o seu interior se puidese reconstruír permanentemente e que, a nivel espacial, a arquitectura posibilitase e apoiase o cambio empresarial que se estaba producindo a nivel interno naquel momento, o que implicaba xerar espazos para o encontro e a comunicación», detallan en MRM Arquitectos.