Unha cociña de luxo en chapa de madeira natural
O Eucalipto Fumed achega a elegancia e a sofisticación que Elle Cocinas precisaba para crear esta cociña de luxo
Unha vivenda de luxo precisa unha cociña que transmita a máxima elegancia e o mesmo luxo có resto de espazos. Esta é a premisa á que se enfrontou neste proxecto Luis Fernández, fundador de Elle Cocinas, que se encarga da xestión integral do proxecto, desde o deseño ata a instalación, incluíndo a fabricación. Luis Fernández contaba xa coa confianza do cliente, un mexicano acaudalado que posúe diferentes vivendas no madrileño barrio de Salamanca e de cuxas cociñas se encarga en exclusiva. No caso deste apartamento na rúa Lagasca, a importancia era maiúscula, xa que os destinatarios finais da vivenda eran os pais do propietario.
A particularidade deste proxecto é que a cociña está situada na estancia que dá acceso ao apartamento e, por iso, o obxectivo era que os visitantes non se decatasen de que é unha cociña. «Posto que este espazo se atopa nada máis entrar ao domicilio, non me parecía nada elegante atopar o vertedoiro nada máis entrar na casa pero, ao mesmo tempo, tiña que ser práctico», explica Luis Fernández. Para iso, creou un deseño adaptado ás necesidades do cliente no que o mobiliario envolve a estancia. O vertedoiro mantense oculto detrás de portas basculantes. Cando están pechadas, a cociña pasa absolutamente desapercibida e, despois, dependendo do uso que se precise, vanse abrindo estas portas abatibles. Cando se abren todas, quedan á vista os elementos dunha cociña, como a vitrocerámica, o lavalouzas ou o vertedoiro, sen perder un ápice da súa elegancia.
Este proxecto, como todos os de Elle Cocinas, é un «traxe á medida». Por exemplo, Luis Fernández cóntanos que «cando o cliente comentou que quería integrar unha viñoteca, pedinlle as distintas copas que utilizaría e fabriquei un soporte específico para recollelas todas nun moble-bar».
Chapa de madeira natural para cociñas
Elle Cocinas apostou por unha das últimas tendencias en cociñas para este proxecto: os tons escuros. Esta súmase á elegancia atemporal da madeira. Para iso, creou un mobiliario personalizado feito con taboleiros de Fibranatur recubertos con chapa de madeira natural Eucalipto Fumed. Con este acabado, a beleza natural da madeira vese acentuada polo proceso de afumado, que lle dá unha cor marrón escuro intensa e matizada con vetas douradas que lle outorgan un aire sofisticado e elegante.
«É unha chapa esteticamente moi bonita. A madeira vese máis natural e cunha tonalidade próxima á de madeiras exóticas coma o wengué. O máis importante é que o cliente quedou moi contento», sinala Luis Fernández ao falar deste material. Malia que esta era a primeira vez que empregaba Eucalipto Fumed, xa utilizara chapa de madeira natural Finsa noutros proxectos mediante a combinación de Fibracolour Negro co canto á vista recuberto con chapa de madeira natural de carballo, por exemplo.
En Elle Cocinas son moi conscientes das solucións de Finsa xa que traballan en exclusiva cos nosos produtos. «Na actualidade, uso paneis Twin Wood de 19 mm de grosor con acabado Gris Tormenta en todos os interiores e aposto por Finsa en todos os proxectos. Estes materiais bríndanme todas as calidades que preciso. Ademais, compráceme poder adquirir produto de calidade fabricado en España. Finsa espértame unha sensación extraordinaria en todos os sentidos. É a maior multinacional española. Empezou desde moi abaixo e, grazas ao seu bo saber facer e dedicación, conseguiu converterse na mellor empresa do sector a nivel mundial».
Os tons escuros como tendencia
Neste proxecto, podemos ver a influencia da nova tendencia en cociñas, que aposta polos tons escuros. Como nos explica o seu deseñador, «tras un dominio dos brillos, agora están de moda as superficies mate. Eu utilizo moito o negro combinado sempre con algunha madeira. Porén, debe tratarse de cociñas con moita luz natural porque, se non, redúcese visualmente o espazo». En Elle Cocinas incorporan billas, perfís ou campás extractoras en negro e miman todos os detalles «porque o conxunto destes detalliños é o que crea unha obra mestra. Convén facelo para sorprender este tipo de clientes, que están acostumados a rodearse da mellor calidade».
